जनकपुरधाम- धनुषाको धनुषाधाम नगरपालिकामा ४ वर्षीय छोरासँगै आमाको शव पोखरीमा फेला परेको छ। धनुषाधाम नगरपालिका-२ धर्मपुर टोलकी २८ वर्षीया अर्चना सिंह र उनको ४ वर्षीय छोरा कुशकुमार सिंहको शव घर नजिकैको खरीमा सोमबार बिहान फेला परेको हो।
आमा छोराको शव पोखरीमा देखेपछि स्थानीयले प्रहरीलाई खबर गरेका थिए। मृतक महिला स्थानीय अशोक सिंहकी श्रीमती हुन्।
पोखरीबाट शव निकालिसकिएको र अनुसन्धान भइरहेको जिल्ला प्रहरी कार्यालय धनुषाका प्रहरी नायब उपरीक्षक जितेन्द्र बस्नेतले जानकारी दिए। हत्या गरिएको वा आत्महत्या रहेको विषयमा अनुसन्धान थालिएको प्रहरीले जनाएको छ।
यद्यपि गए राति श्रीमान श्रीमतीबीच विवाद हुँदा अर्चनाले छोरालाई लिएर पोखरीमा हाम फालेर आत्महत्या गरेको हुन सक्ने स्थानीयको भनाई छ। घटनाको विषयमा अनुसन्धान भइरहेको जिल्ला प्रहरी कार्यालय धनुषाले जनाएको छ।