बलात्कार आरोपित एसएसपी अधिकारी पुर्पक्षका लागि कारागार चलान

काठमाडौं– बलात्कारका आरोपित सशस्त्र प्रहरी बलका प्रहरी वरिष्ठ उपरीक्षक (एसएसपी) राजेन्द्र अधिकारी कारागार चलान भएका छन्। कास्की जिल्ला अदालतले मंगलबार पुर्पक्षका लागि थुनामा राख्न आदेश दिएपछि अधिकारी कारागार चलान भएका हुन्।

जिल्ला अदालतका न्यायाधीश दीपककुमार पोखरेलको इजलासले अधिकारीलाई थुनामा राख्न आदेश दिएको अदालतका सूचना अधिकारी रामचन्द्र उपाध्यायले जानकारी दिए। जिल्ला सरकारी वकिल कार्यालयमार्फत आइतबार अधिकारीविरुद्धको अभियोग अदालतमा दर्ता भएको थियो।

अधिकारीको बयान र केही बहस सोमबार सकिए पनि बाँकी बहस र आदेश मंगलबार सकिएको हो। उपाध्यायका अनुसार तीन जना सरकारी वकिल र पाँच जना प्रतिवादीतर्फका वकिलले थुनछेक बहस गरेका थिए।

भरतपुर चितवनकी एक महिलालाई अधिकारीले आफ्नो क्वार्टरमा खाना खान बोलाएर बलात्कार गरेको उजुरी परेपछि असार ३१ गते प्रहरीले पक्राउ गरेको थियो। अधिकारी सशस्त्र प्रहरी बल तालिम केन्द्र पोखरामा कार्यरत थिए। उनको सरुवासमेत भैसकेको थियो।