वीरगन्ज- पर्साको वीरगन्जमा थप ५५ जनामा कोरोना संक्रमण पुष्टि भएको छ ।
नारायणी अस्पतालको प्रयोगशालामा सोमबार राति गरिएको परीक्षणमा ९ जना प्रहरीसहित ५५ जनामा कोरोना संक्रमण पुष्टि भएको हो ।
वडा प्रहरी कार्यालय विर्ताका ८ र जिल्ला प्रहरी कार्यालय पर्साका एक जना गरी ९ जना प्रहरीमा पनि कोरोना संक्रमण देखिएको नारायणी अस्पतालका चिकित्सक डा निरजकुमार सिंहले जानकारी दिए ।
उनका अनुसार नारायणी अस्पतालका थप ५ जना स्टाफमा पनि कोरोना संक्रमण देखिएको छ । कृषि सामाग्री प्रालिका एक जना कर्मचारीमा पनि कोरोना पोजिटिभ देखिएको छ ।
संक्रमितहरुमा २७ जनामा कन्टयाक्ट ट्रेसिङका क्रममा संक्रमण पुष्टि भएकाहरु छन् भने ५ जना संक्रमितमा ज्वरो र खोकीको लक्षण देखिएका छन् । पैसा तिरेर स्वयम् परीक्षणका लागि आएका ४ जनामा पनि कोरोना पुष्टि भएको डा सिंहले जानकारी दिए ।
थपिएका संक्रमितमध्ये ३ जना बाराका हुन् । लकडाउन खुलेसँगै पर्सामा संक्रमण तिब्र गतिमा बढेको छ । समुदाय स्तरमा संक्रमण फैलिएको छ ।