प्रधानमन्त्री ओली वाल्मीकि बन्ने बाटोमा अग्रसर : राणा

काठमाडौं– राष्ट्रिय प्रजातन्त्र पार्टी (राप्रपा) का अध्यक्ष पशुपतिशमशेर राणाले लिपुलेक, लिम्पियाधुरा फिर्ता लिने राष्ट्रिय चाहनाबाट विमुख भएर प्रधानमन्त्री केपी ओली रामनाम जप्दै वाल्मीकि बन्ने बाटोमा अग्रसर देखिएको टिप्पणी गरेका छन्।

राणाले राष्ट्रियता जोगाउने जिम्मेवारी प्रधानमन्त्री ओलीले भुलेबाट ठोरी–ठोरी भन्दाभन्दै वाल्मीकि जन्मन सक्ने इंगित गरे।

‘मूल हाँक लिपुलेक, लिम्पियाधुरा फिर्ता लिनु हो। राष्ट्रिय चाहना यही हो,’ राणाले सोमबार ट्विट गरेका छन्, ‘तर प्रधानमन्त्रीले कूटनीति, वार्ताबाट भोगचलन कायम गर्ने जिम्मा भूले जस्तो छ।’

उनले शब्द आडम्बरले राष्ट्रियता नजोगिने बताएका छन्। उनले भनेका छन्, ‘राम–राम, ठोरी–ठोरी जप्दाजप्दै वाल्मीकि जन्मिए अर्कै प्रसंग। त्यसो भए रूपान्तर, विषयान्तर दुवै हुनेछ।’