शुक्रबार, कात्तिक १४, २०७७

Happy Dashain
विदेश समाचार

भारतमा राजनीतिज्ञहरुमाथि कोरोनाको आक्रमण, मन्त्रीसहित कयौँ सांसद र विधायकको मृत्यु

1600943410.jpg
केन्द्रीय रेल राज्य मन्त्री सुरेश अंगडी

एजेन्सी- कोरोना भाइरसबाट बुधबार राति भारतका केन्द्रीय रेल राज्य मन्त्री सुरेश अंगडीको निधन भयो। ११ सेप्टेम्बरमा कोरोना पुष्टि भएका ६५ वर्षीय मन्त्री अंगडीको एम्स अस्पतालमा उपचारका क्रममा निधन भएको थियो।

सुरेश अंगडी जस्तै भारतमा थुप्रै राजनीतिज्ञहरु कोरोनाको शिकार भइसकेका छन्। जसमध्ये पूर्व राष्ट्रपति, चार सांसद तथा कयौँ विधायकहरुले ज्यान गुमाएका छन्।

कोरोनाबाट मृत्यु हुनेमा सबैभन्दा ठूला राजनीतिज्ञ पूर्व राष्ट्रपति प्रणव मुखर्जी हुन्। उनको भारतीय सेनाको आर एण्ड आर अस्पतालमा ३१ अगस्टमा निधन भएको छ।

यस्तै १६ सेप्टेम्बरमा आन्ध्र प्रदेशस्थित तिरुपतिका सांसद बल्ली दुर्गा प्रसादको चेन्नेईस्थित अपोलो अस्पतालमा कोरोनाबाट निधन भएको छ। ६४ वर्षीय उनी श्रमिक रायथु कांग्रेस पार्टीका नेता थिए।

यस्तै राज्यसभा सांसद अशोक गस्तीको पनि कोरोना संक्रमणबाट मृत्यु भएको छ। ५५ वर्षीय उनी कर्नाटकबाट राज्यसभाका लागि भारतीय जनता पार्टीका सांसद थिए।

यसअघि २८ अगस्टमा तमिलनाडुको कन्याकुमारीका कांग्रेस सांसद एच वसन्तकुमारको कोरोना संक्रमणबाटै निधन भएको थियो। ७० वर्षका उनी १० अगस्टमा कोरोना संक्रमित भएपछि अस्पताल भर्ना भएका थिए।

यसका साथै उत्तर प्रदेश, मध्ये प्रदेश, पश्चिम बंगाल तथा तमिलनाडुका कयौँ विधायकको कोरोना संक्रमणबाट मृत्यु भएको छ।
उत्तर प्रदेशमा एक महिनामा दुई मन्त्रीको निधन भएको छ।

योगी आदित्यनाथको मन्त्रिपरिषदकी एक मात्र महिला मन्त्री कमल रानी वरुणको कोरोना भाइरसबाट निधन भयो। उनी शिक्षा मन्त्री थिइन्।

क्रिकेटरबाट नेता भएका नागरिक सुरक्षा मन्त्री चेतन चौहानको पनि कोरोना संक्रमणबाट मृत्यु भयो। संक्रमित भएपछि उनको भेन्टिलेटरमा राखेर उपचार हुँदै गर्दा मृत्यु भएको थियो।

यसै क्रममा मध्य प्रदेशबाट कांग्रेस विधायक गोवर्धन डांगीको १५ सेप्टेम्बरमा कोरोना भाइरस संक्रमणका कारण मृत्यु भएको छ। गोवर्धन डांगी राजगढस्थित ब्यावराबाट विधायक थिए।

पश्चिम बंगालमा त्रिणमुल कांग्रेस विधायक समरेश दास र पार्टीमा उनका सहकर्मी तमोनाश घोषको पनि कोरोना भाइरस संक्रमणबाट मृत्यु भएको छ।
पूर्वी मिदनापुरस्थित एगराबाट विधायक भएका समरेश दास ७६ वर्षका थिए भने ६० वर्षीका तमोनाश घोष दक्षिण २४ परगना जिल्लाको फाल्टाबाट विधायक थिए।

त्यस्तै तमिलनाडुमा डिएमके नेता जे अंबाझगनको जुन महिनामा कोरोना संक्रमणबाट निधन भयो। उनी चेपुक–तिरुवल्लीकेनीबाट विधायक थिए।

त्यसैगरी लेहबाट निर्वाचित वरिष्ठ कांग्रेस नेता एवम् पूर्व मन्त्री पी नामग्यालको पनि गत जुन महिनामै कोरोनाबाट मृत्यु भएको छ। ८३ वर्षका उनी राजीव गान्धी सरकारको मन्त्री बनेका थिए।

महाराष्ट्रका सांसद हरिभाउ जावलेको पनि कोरोना भाइरसको संक्रमणबाट मृत्यु भएको छ। उनको अगस्ट महिनामै मृत्यु भएको हो।

७६ वर्षका सीपीआईएम नेता श्यामल चक्रबर्तीको पनि कोरोना संक्रमणबाट मृत्यु भएको छ। उनी परिवहन मन्त्री बनिसकेका नेता हुन्।
कोरोनाबाट ज्यान गुमाउने बाहेक भारतका थुप्रै ठूला नेताहरुमा कोरोना संक्रमण भइसकेको छ।

केन्द्रीय गृहमन्त्री अमित शाहलगायत थुप्रै नेता संक्रमित भइसकेका छन् भने कतिपयको उपचार जारी छ।

भारतमा कोरोना भाइरसको संक्रमण लगातार बढ्दै गएको छ। अहिलेसम्म ९१ हजार १४९ जनाको मृत्यु भइसकेको छ भने ५७ लाख ३२ हजारभन्दा बढीमा संक्रमण पुष्टि भएको छ।
बीबीसी हिन्दीबाट
 

प्रतिक्रिया दिनुहोस्