काठमाडौं- नेपाली कांग्रेसको १४ औं महाधिवेशनअन्तर्गत १३ जिल्लाको वडाधिवेशन असोज ५ मा पनि हुन नसक्ने देखिएको छ। २० जिल्लाको वडाधिवेशन एकैदिन गर्न केन्द्रीय निर्वाचन समितिले ५ असोजका लागि मिति तय गरेको छ।
तर, त्यसको तयारीका लागि एक दिनमात्रै बाँकी रहँदा पनि १३ जिल्लाको क्रियाशील सदस्यताको टुंगो भने अझै लाग्न सकेको छैन।
निर्वाचन समिति सदस्य गोपालकृष्ण घिमिरेले आइतबार बेलुकीसम्म पनि १३ जिल्लामा क्रियाशील सदस्यकै टुंगो नलागेका कारण मंगलबार ती जिल्लाको वडाधिवेशन हुने सम्भावना टरेको बताएका छन्।
उनका अनुसार मंगलबार काठमाडौं, मोरङ, काभ्रेपलाञ्चोक, सिन्धुपाल्चोक, बाजुरा, कपिलवस्तु र बर्दियामा वडाधिवेशन हुनेछ ।
त्यसबाहेक पर्सा, बारा, रौतहट, सर्लाही, महोत्तरी, धनुषा, सिरहा, सप्तरी, डोल्पा, रसुवा, बाँके, सुर्खेत र कैलालीमा सदस्यताको टुंगो नलागेका कारण अधिवेशन अनिश्चित बनेको हो।
कांग्रेसले यी २० जिल्लाको वडा अधिवेशन एकैदिन गर्नकै लागि ५ असोजमा वडाधिवेशन गर्ने मिति तोकेको थियो।
कांग्रेसको पालिका तहको अधिवेशन ९ असोजमा गर्ने कार्यतालिका छ। त्यस आधारमा मंगलबारसम्म सदस्यता टुंगो लागेको अवस्थामा ८ असोजभित्र वडाधिवेशन पूरा गरेर सबै जिल्लामा एकैपटक पालिका अधिवेशन गर्न सकिने विषयमा छलफल भइरहेको नेताहरुले बताएका छन्।