बुधबार, कात्तिक १२, २०७७

Happy Dashain
खेलकुद

महिला खेलाडीसँग सेन्ट्रल कन्ट्रयाक्ट गर्ने क्यानको निर्णय

1600789430.png

 काठमाडौं – नेपाल क्रिकेट संघ (क्यान) को बोर्ड बैठकले महिला खेलाडीसँग सेन्ट्रल कन्ट्रयाक्ट गर्ने निर्णय गरेको छ। 

चितवनमा मंगलबार सम्पन्न बैठकले १८ सिनियर महिला खेलाडीसँग कन्ट्रयाक्ट गर्ने निर्णय गरेको हो।

सेन्ट्रल कन्ट्रयाक्ट गर्ने १८ खेलाडीले तलब पाउने छ। जसमा श्रेणीअनुसार ए, बी र ‘सी’मा पर्नेले क्रमशः १५, १२ र १० हजार पाउनेछन्। 

यसअघि महिला खेलाडीले तलब पाएका थिएनन्। यो तलब २०२० को जनवरीबाटै लागू हुनेछ।

क्यान उपाध्यक्ष राजुबाबु श्रेष्ठकाअनुसार बैठकले १८ पुरुष खेलाडीको तलबको वर्गिकरण गर्ने निर्णय पनि गरेको छ। 

जसअनुसार ‘ए’मा पर्ने खेलाडीले ५० हजार, बी श्रेणीमा पर्नेले ४० हजार र ‘सी’मा पर्नेले ३० हजार तलब प्राप्त गर्ने छन्।

नयाँ तलब आईसीसीमा प्रस्ताव गर्ने श्रेष्ठले जानकारी दिए। त्यस्तै, क्यानले असोज २८ गते भर्चुअल साधारणसभा गर्ने भएको छ। 

त्यसैगरी, बाङ्लादेशमा भएको टी २० विश्वकप २०१४ मा उत्कृष्ट प्रदर्शन गरेका पारस खड्काले पाउने टोयटा कारका लागि क्यानले कर छुटमा पहल गर्ने भएको छ।

बैठकले खेलाडीको बीमाका बारेमा पनि निर्णय गरेको छ। ललितसिंह भण्डारी दुर्घटनामा परेपछि भैपरी आउने घटनाबारे पनि सोच्नुपर्ने भएको श्रेष्ठले जानकारी दिए। 

बीमाको लागि कोषध्यक्ष रोशन सिंहसहित छुम्बी लामा र दुर्गाराज पाठक रहेको समिति गठन गरिएको छ। यसले खेलाडीसहित मैदानमा खटिने कर्मचारीको स्वास्थ्य जीवन बीमा गराउने छ।

त्यस्तै, बोर्डले राष्ट्रिय टीमका कप्तान ज्ञानेन्द्र मल्ल र प्रशिक्षक जगत टमाटासँग पनि छलफल गरेको छ। बैठकपछि मल्लले कोरोनापछिको क्रिकेट र एकदिवसीय मान्यता कायम राख्नको लागि गर्न सकिने अभ्यास र पहलको बारेमा छलफल भएको बताएका छन्।

साथै, राष्ट्रिय खेलकुद परिषद्सँग समन्वय गरेर क्यानले मंसिरसम्ममा सिनियर पुरुष र महिला क्रिकेट प्रतियोगिताका लागि पहल गर्ने निर्णय गरेको छ। यसका लागि क्यानले क्लोज क्याम्पको प्रयास गर्ने निर्णय गरेको बताएको छ।
 

प्रतिक्रिया दिनुहोस्