कैलालीको धनगढीमा कोरोना भाइरस परीक्षणका लागि थप एउटा प्रयोगशाला स्थापना भएको छ । धनगढीस्थित स्वास्थ्य कार्यालय कैलालीमा प्रयोगशाला स्थापना भएको हो ।
सेती प्रादेशिक अस्पतालले उक्त प्रयोगशाला सञ्चालन गर्नेछ। प्रयोगशालामा उपकरण जडानको काम सकिएको बताउँदै सेती प्रादेशिक अस्पतालका प्रयोगशाला इन्चार्ज रमेश शाहीले भने– मेसिनको भ्यालिडेसन भइरहेको छ, पर्सीदेखि सञ्चालनमा आउँछ ।
धनगढीको पशुपक्षी अन्वेषण प्रयोगशालामा परीक्षण गरिएका स्वाबको नयाँ स्थापना गरिएको प्रयोगशालामा पुनः परीक्षण भइरहेको बताउँदै प्रयोगशाला इन्चार्ज शाहीले आवश्यक जनशक्तिको व्यवस्थापन भए नयाँ स्थापना गरिएको प्रयोगशाला मार्फत दैनिक एक हजार स्वाब परीक्षण गर्न सकिने बताए।
चैत १५ गते बसेको सुदूरपश्चिम प्रदेश मन्त्रीपरिषद्को बैठकले धनगढी, डोटी र बैतडीमा कोरोना परीक्षणका लागि प्रयोगशाला स्थापना गर्ने निर्णय गरेको थियो । सोही निर्णय अनुसार धनगढीमा थप प्रयोगशाला स्थापना भएको हो ।
डोटी र बैतडीमा समेत प्रयोगशाला स्थापनाको कार्य भइरहेको प्रदेशको सामाजिक विकास मन्त्रालयले जनाएको छ ।
अहिले सुदूरपश्चिम प्रदेशमा डडेल्धुरा र धनगढीमा एउटा एउटा प्रयोगशाला मार्फत कोरोना परीक्षण भइरहेको छ ।
डडेल्धुराको प्रयोगशाला जनस्तरबाट रकम संकलन गरेर स्थापना गरिएको हो भने धनगढीको प्रयोगशाला संघीय सरकारले स्थापना गरेको हो ।