सेतीमा बेपत्ता दुवै स्वास्थ्यकर्मीको शव फेला

धनगढी– सेती नदीमा नुहाउने क्रममा शनिबार दिउँसो बेपत्ता भएका डडेल्धुरा अस्पतालमा कार्यरत दुवैजना स्वास्थ्यकर्मीको शव फेला परेको छ ।

सेती नदीमा नुहाउने क्रममा बगेर बेपत्ता बझाङ स्थायी घर भएका हेल्थ असिस्टेन्ट विनय सिंहको शव आज फेला परेको हो । सिंहको शव बेपत्ता भएको स्थानबाट करिब एक किलोमिटर तल भेटिएको हो ।

डोटीको शिखर नगरपालिकाको बान्डुंग्रीसैनको सेती किनारमा स्थानीयले शव फेला पारेको डोटीका प्रहरी प्रमुख प्रहरी उपरीक्षक जनकराज पाण्डेले बताए ।

केहीबेर अघि शव भेटिएको खबर आएको छ प्रहरी उपरीक्षक जनकराज पाण्डेले भने–अहिले प्रहरी टोली त्यहाँ पुगेको छ तर सो शव बेपत्ता भएका सिँहकै हो भन्ने पहिचान हुन बाँकी छ । तर, डडेल्धुरा अस्पतालका कर्मचारीहरुले भने भेटिएको शव सिंहकै भनेर पुष्टि गरेका छन् ।

हिजो डडेल्धुराको परशुराम नगरपालिका घर भएका ल्याब असिस्टेन्ट हरिश जोशीको शव डोटीको केआईसिंह गाउँपालिकाको नारीदाङमा फेला परेको थियो । उनको शव घटनास्थल भन्दा निकै टाढा फेला परेको थियो ।

शनिबार डडेल्धुरा अस्पतालमा कार्यरत चार जना डोटीस्थित शैलश्वरी मन्दिर दर्शनका लागि गएका थिए । दर्शन गरेर फर्कदा नुहाउने क्रममा उनीहरु मध्ये तीनजनालाई नदीले बगाएको थियो ।

बगेका मध्ये खगेन्द्र कुँवरलाई स्थानीयले उद्धार गरी बचाएका थिए भने हरिश जोशी र बझाङ स्थायी घर भएका हेल्थ असिस्टेन्ट विनय सिंह बेपत्ता भएका थिए ।