काठमाडौं- कञ्चनपुरको बेलौरी नगरपालिका–७, भगतपुरमा शुक्रबार राति धारिलो हतियार प्रहार गरेर एक महिलाको हत्या गरिएको छ। हतियार प्रहारबाट ५५ वर्षीया बेलु खातीको हत्या गरिएको हो। हतियार प्रहारबाट मृतकका पति ६३ वर्षीय घनश्याम खाती गम्भीर घाइते छन्।
जिल्ला प्रहरी कार्यालय, कञ्चनपुरका प्रवक्ता एवं प्रहरी नायब उपरीक्षक अमरबहादुर थापाले पत्नीको हत्या गरिएको र पति गम्भीर घाइते अवस्थामा भेटिएको जानकारी दिए।
“घरमै सुतिरहेको अवस्थामा राति करिब १ बजेको समयमा घटना भएको देखिन्छ,” घटनास्थलमै रहेका उनले टेलिफोनमा भने, “धारिलो हतियारले दुवैको छातिको भागमा गहिरो चोट देखिएको छ।”
गम्भीर घाइते भएका घनश्यामलाई राति नै बेलौरीबाट उपचारका लागि सेती प्रादेशिक अस्पताल पठाइएको थियो। त्यहाँ पनि उपचार हुन नसकेपछि राति नै उपचारका लागि नेपालगन्ज रिफर गरिएको प्रहरीले जनाएको छ।
अज्ञात समूहकै आक्रमणबाट हत्या भएको प्रहरीको प्रारम्भिक अनुसन्धानले देखाएको छ। “घटनास्थलमा तालिमप्राप्त कुकुर परिचालन गरेर अहिले हामी अनुसन्धान गर्दैछौं,” डिएसपी थापाले भने, “कसले र किन हत्या गरेको भन्ने केही खुलिसकेको छैन।”
प्रहरीले आवश्यक अनुसन्धानका लागि भन्दै खाती दम्पतीका छोरा राजेश खाती र स्थानीय दिनेश रानालाई नियन्त्रणमा लिएको छ।