काठमाडौं– इटालियन शीर्ष डिभिजनको फुटबल लिग सिरी ए मा जित निकाल्ने क्रममा साविक विजेता इन्टर मिलानले बोलोगन्याको पोस्टमा ६ गोल गरेको छ।
४५ प्रतिसत समय मात्र बलमा नियन्त्रण बनाउन सकेको मिलानले पहिलो हाफमा तीन र दोस्रो हाफमा तीन गोल गरेको हो। र, बोलोगन्याले ८६ औं मिनेटमा गोल फर्काएपछि खेल ६–१ गोलअन्तरको नतिजाले इन्टर मिलानको पोल्टामा परेको हो।
इन्टरको जितका लागि लाउटारो मार्टिनेजले छैटौं मिनेटमै अग्रता बनाएका थिए। ३०औं मिनेटमा मिलन स्क्रिनिरले र ३४औं मिनेटमा निकोलो ब्यारेलाले गोल गरेपछि पहिलो हाफमा इन्टर मिलान ३–० गोलले अघि रह्यो।
दोस्रो हाफको ६३औं र ६८औं मिनेटमा इडिन जेकोले गोल गरे भने त्यसअघि ५४औं मिनेटमा माथिस वेसिनोले गोल गरेका थिए। यससँगै ६–० गोलको अग्रता बनाएको इन्टरले ६–१ गोलको जित निकाल्यो।
जितसँगै चार खेलबाट १० अंक बनाएको मिलान सिरीएको शीर्षस्थानमा छ। पराजित बोलोगन्या भने ७ अंकका साथ आठौं स्थानमा छ।