काठमाडौं– राजधानीको कमलादीमा मंगलबार बेवारिसे फेला परेको भनिएको १५ किलो नक्कली सुन प्रकरण रहस्यमय बनेकाे छ।
गिरोहले सुन र पेस्तोल फालेर स्कार्पियोमा भागेको सम्बन्धमा अनुसन्धान गरिरहेको टोलीले घटना थप रहस्यमय बन्दै गएको निष्कर्ष निकालेको हो।
सुन राखिएको झोला कमलादीमा भेटिएको भनिए पनि अनुसन्धानमा अन्यत्रै फ्याँकेको पाइएको एक उच्च प्रहरी अधिकृतले बताए। महानगरीय प्रहरी वृत्त दरबारमार्गले १५ किलो सुन रहेको झोला कमलादीमा फेला पारेको बताउँदै आएको छ।
सीसीटीभी फुटेज हेर्दा उक्त झोला सुन्धाराबाट बरामद गरिएको देखिएको अनुसन्धानमा संलग्न ती उच्च अधिकृतले बताए।
‘स्कार्पियोभित्रबाट कमलादीस्थित नबिल बैंकअगाडि झोला फालेको भनिए पनि उक्त सामान भएको झोला सुन्धाराबाट बरामद भएको छ’, ती अधिकृतले भने, ‘छानबिन जारी छ। वास्तविकता छिट्टै बाहिर आउला।’
यता, महानगरीय प्रहरी कार्यालयले गठन गरेको छानबिन समितिको संयोजक २४ घण्टा नबित्दै परिवर्तन गरिएपछि घटना थप शंकास्पद बनेको छ।
अपराध महाशाखाका प्रमुख दीपक थापाको संयोजकत्वमा छानबिन समिति गठन गरिएको थियो।
उनको ठाउँमा बिहीबार महानगरीय प्रहरी कार्यालयका प्रवक्तासमेत रहेका एसएसपी सुशील यादवलाई जिम्मेवारी दिइएको छ।
महानगरीय प्रहरी कार्यालयका एसएसपी किरण बज्राचार्यको ठाउँमा यादवलाई ल्याइएपछि उनी वरिष्ठताका आधारमा संयोजक भएका हुन्। बज्राचार्य यसअघि छानबिन समितिमा सदस्य थिए।
डीआईजी विश्वराज पोख्रेलले बज्राचार्य एसिड प्रकरणमा केन्द्रित भएकाले यादवलाई समितिमा राखिएको बताए।
प्रहरी स्रोतका अनुसार संयोजक फेर्नुको कारण भने फरक छ। घटनामा महानगरीय प्रहरी परिसरका प्रमुख एसएसपी श्याम ज्ञवालीमाथि पनि छानबिन हुँदै छ।
‘थापा र ज्ञावालीबीच पहिलेदेखि विवाद छ’, प्रहरीका एक उच्च अधिकृतले भने, ‘थापाले सत्यतथ्य कुरा बाहिर ल्याए पनि पूर्वाग्रही बनेको आरोप लाग्न सक्ने भएकाले संयोजक फेरिएको हो।’
परिसर र महाशाखा अन्तरसम्बन्धित भएकाले पनि एकले अर्काको छानबिन गर्न नमिल्ने उनले बताए।
समितिमा थापा, एसपी सोमेन्द्रसिंह राठौर, डीएसपी राजकुमार केसी र दुर्गा दाहाल सदस्य छन्।
प्रहरीले सुरुमा १५ किलो सुन बरामद गरेको भने पनि परीक्षणका क्रममा आधा किलो मात्र सुन र बाँकी चाँदी देखिएको थियो।
‘प्रहरीले सुनलाई चाँदी बनाएन होला। तर, बरामद गरिएको ठाउँ फरक पर्नु र स्कार्पियो नियन्त्रणमा लिन नसक्नुले दरबारमार्ग प्रहरी युनिटमाथि शंका गर्ने ठाउँ प्रशस्त छ’, ती अधिकृतले भने।
प्रहरीले कृष्ण पाउरोटी नजिक रोक्न खोज्दा स्कार्पियो भागेर केही परबाट झोला फालेको थियो। स्कार्पियोबारे अन्य प्रहरी युनिटलाई समयमै खबर नगरेकाले दरबारमार्गका डीएसपी रञ्जन दाहालमाथि शंका उब्जिएको ती अधिकृतले बताए।
डीएसपी दाहालले ट्राफिक प्रहरीलाई टिपाएको स्कार्पियोको नम्बर र पछि पत्रकार सम्मेलनमा भनेको नम्बर नै फरक छ। दाहालले ट्राफिक
प्रहरीलाई स्कार्पियोको नम्बर बा६च ५५११ टिपाएका थिए भने पत्रकार सम्मेलनमा एसएसपी ज्ञवालीले बा६च ५५१९ भनेका थिए।
‘घटना हेर्दा प्रहरीलाई सुन बोकेको स्कार्पियोबारे पहिल्यै जानकारी रहेको र सूचना दिने मान्छेले स्कार्पियो जोगाउने सर्तमा मात्र प्रहरीलाई जानकारी दिएको हुन सक्छ’, अर्का प्रहरी अधिकृतले भने, ‘प्रहरीले चाहेको भए उक्त स्कार्पियो तत्काल नियन्त्रणमा लिन सक्थ्यो।’
छानबिन समितिले त्यही समयमा उक्त क्षेत्रमा यस्तो घटना नभएको तथ्य फेला पारेको छ। समितिका एक सदस्यले भने, ‘हामीलाई घटनास्थलबारे शंका लागेको छ। कमलादीमा त्यो समयमा त्यस्तो कुनै गतिविधि भएको देखिँदैन।’
डीएसपी दाहालले पत्रकार सम्मेलनमा झोलातर्फ केन्द्रित हुँदा गाडी फुत्किएको बताएका थिए।
दाहालले गाडी फुत्किएलगत्तै अन्य प्रहरीलाई अलर्ट गराए–नगराएको वा माथिल्लो निकायमा समयमै जानकारी दिए–नदिएको विषयमा पनि अनुसन्धान थालिएको एक सदस्यले बताए।
डीआईजी पोखरेलले गाडी समात्न नसकिएको विषयमा अनुसन्धान हुने बताए। उनले प्रहरीको लापरबाही वा नियतबस गल्ती भएको भए कारबाही हुने बताए।
स्कार्पियो फेला परेको छैन भने उक्त घटनामा संलग्न रहेको आरोपमा अपराध महाशाखाको समन्वयमा बुधबार नवलपरासी पूर्वबाट तीन जना पक्राउ परेका थिए।
पक्राउ पर्नेमा निलेश सखिया, विजय पटेल र देवान सिंह छन्। उनीहरु भारततर्फ जान लागेको बेला पक्राउ परेका हुन्। उनीहरुलाई काठमाडौंबाट लैजाने ट्याक्सीसमेत नियन्त्रणमा लिइएको प्रहरी स्रोतले बतायाे।