खासाको ‘केरुङ च्छो’ पोखरी भरिएर फुट्ने खतरा, भोटेकोसीमा बाढीको त्रास

काठमाडौं- चीनको खासा क्षेत्रमा रहेको ‘केरुङ च्छो’ नामको पोखरीमा पानी भरिएपछि फुट्ने खतरा बढेको छ।

जिल्ला प्रशासन कार्यालय सिन्धुपाल्चोकले आज एक सूचना जारी गर्दै उक्त पोखरी भरिएर फुट्ने खतरा बढेकाले भोटेकोसी नदीमा आकस्मिक रुपमा पानीको बहाव बढ्न सक्ने भन्दै सचेत गराएको छ।

प्रशासनले भोटेकोसीमा पानीको बहाव अत्यधिक बढ्ने भई नदी किनारमा रहेका भोटेकोसी गाउँपालिका, बाह्रबिसे नगरपालिकालगायत स्थानीय तहका बजार तथा बस्तीहरुलाई बगाउन सक्ने र ठूलो क्षति पुर्याउन सक्ने सम्भावना रहेको भन्दै सचेत गराएको हो।

सम्भावित जोखिमबाट बच्न आवश्यक पूर्वतयारी अपनाउन र भोटेकोसी किनारका बस्तीका सर्वसाधारणलाई तत्काल उक्त क्षेत्र छोडी सुरक्षित ठाउँमा जाने व्यवस्था मिलाउन जिल्ला विपद व्यवस्थापन समिति सिन्धुपाल्चोकले अनुरोध गरेको छ। 

सिन्धुपाल्चोक प्रमुख जिल्ला अधिकारी उमेशप्रसाद ढकालले भनेका छन्, 'भोटेकोसी किनारको बस्तीका सर्वसाधारणलाई तत्काल उक्त क्षेत्र छाडी सुरक्षित ठाउँमा जाने व्यवस्था मिलाउन अनुरोध गरिन्छ।'