टी-२० को कप्तानी छोड्ने विराट कोहलीको घोषणा

काठमाडौं- भारतको राष्ट्रिय क्रिकेट टोलीका कप्तान विराट कोहलीले टी-२० को कप्तानी छाड्ने घोषणा गरेका छन्।

आगामी अक्टोबरमा दुबईमा हुने टी-२० विश्वकपपछि उनले छोटो फर्म्याटको क्रिकेटमा भारतीय टोलीको कप्तानी छाड्ने निर्णय गरेका हुन्। बिहीबार ट्विट गर्दै कोहलीले यहाँसम्म आइपुग्नका लागि सहयोग गर्ने सबैलाई धन्यवाद दिँदै यो निर्णय लिएको बताएका छन्।

‘८-९ वर्ष लगातार तीन वटै फर्म्याट खेलिरहेको छु र निरन्तर ५-६ वर्षदेखि कप्तानी गरिरहेको छु। ‘अब भारतीय टोलीलाई एकदिवसीय र टेस्टमा नेतृत्व गर्नका लागि आफूलाई ‘स्पेस दिनुपर्ने महसुस गरेको छु। मैले अहिलेसम्म टी-२० मा मेरो सबै थोक दिएको छु। अब टी२० ब्याट्सम्यानको रूपमा अझै पनि उत्तिकै योगदान गर्नेछु,’ उनले भनेका छन्।