नदीमा पानीको सतह बढेपछि तराईमा उच्च सुरक्षा सतर्कता

पर्सा- बिहीबार रातिदेखि परेको अविरल वर्षाले तराईका जिल्लाको जनजीवन प्रभावित बनेको छ।

नदीमा पानीको सतह बढेसँगै जिल्लाका तटीय क्षेत्रका बासिन्दामा त्रसित बनेका छन्।

बारा, पर्सा, रौतहट, सप्तरी लगायतका जिल्लाका खोलानालामा पानीको बहाव बढेको छ। नदीमा पानीको सतह बढेपछि उच्च सुरक्षा सतर्कता अपनाइएको प्रहरीले जनाएको छ।

बाराका मोतीसर, भलुही, पसाह, जमुनी, पर्साका तिलावे, भलुवाही, गण्डक नहरमा पसेकाे बाढीले सडक, बाटोघाटो लगायतको क्षेत्र डुबानमा परेको छ।

रौतहटमा बागमती र जमुनीमा पानीको सतह बढेको स्थानीयले जानकारी दिएका छन्।

पर्साका छिपहरमाई र पाकहामैनपुर गाउँपालिकाको मिर्जापुर, भलवहिया, सम्झाता, भेडिहर्वा, चरगाह, पुर्वारी, टिहुकी, जयमगलापुर, बुढगाई, झलमहिया, तुलसी बार्वा, बन्जारी, भिस्वालगायत बर्सेनि डुबानमा पर्ने गरेको छ।

जोखिमयुक्त क्षेत्रमा उच्च सतर्कता अपनाइएको पर्साका प्रहरी नायब उपक्षीक मनोजित कुँवरले बताए।

उनले भने, ‘दैवी प्रकोप तथा उद्धार समितिको निर्णयअनुसार नेपाल प्रहरी, सशस्त्र र नेपाली सेनासमेत तयारी अवस्थामा छ।’