भारतमा ८ जना प्रहरीको हत्या गरेका भनिएका गुण्डा नाइके विकास दुबे प्रहरीसँगको मुठभेडमा मारिएका छन्।
बीबीसीका अनुसार हिजो पक्राउ परेका दुबेलाई उज्जैनबाट कानपुर लगिँदै थियो। बीच बाटोमा दुबेलाई चढाइएको गाडी पल्टिन पुग्यो।
त्यसपछि उनले भाग्ने कोसिस गरे। त्यसक्रममा गोली चलाउँदा उनी मारिएको प्रहरीले दाबी गरेको छ।
भारतको कानपुरमा ८ जना सुरक्षाकर्मीको हत्या गरेको अभियोग लागेका विकास दुबे हिजो बिहीबार पक्राउ परेका थिए।
उनी मध्य प्रदेशको उज्जैनबाट पक्राउ परेका हुन्।
गुण्डा समूहका नाइके दुबेमाथि कानपुरमा डीएसपीसहित ८ जना प्रहरीको हत्या गरेको अभियोग छ।
गएको शनिबार राति दुबेलाई पक्राउ गर्न उनको घरमा गएको प्रहरीमाथि दुबेको समूहले अन्धाधुन्ध गोली प्रहार गर्दा एक जना डीएसपी, ३ जना सबइन्स्पेक्टर र ४ जना प्रहरी जवान मारिएका थिए।
प्रहरीको हत्या गरी दुबेको ग्याङ फरार भएको थियो।
केही वर्षअघि उत्तर प्रदेशमा एक राज्यमन्त्रीको हत्या गरेको आरोपमा पनि प्रहरीले उनको खोजी गरिरहेको थियो। हत्या, लुटपाट, अपहरणका मुद्दामा धेरै पटक पक्राउ परेका दुबै राजनीतिक संरक्षणका कारण बारम्बार रिहा हुँदै आएको भारतीय सञ्चारमाध्यमहरुले उल्लेख गरेका छन्।
यसपटक उनी पक्राउ परेपछि धेरै उच्चअधिकारी र नेताहरुको पोल खुल्ने अपेक्षा गरिएकोमा उनी प्रहरीको इन्काउन्टरमा मारिएका छन्।