स्पेनिस ला लिगा अन्तर्गत आज (आइतबार) साँझ सम्पन्न खेलमा रियल मड्रिडले एथ्लेटिक क्लबविरुद्ध १–० गोलको संघर्षपूर्ण जित निकालेको छ। एथ्लेटिक क्लबको सान म्याम्स रंगशालामा सम्पन्न खेलमा रियलले संघर्षपूर्ण जित निकालेको हो।
जितका लागि कप्तान सर्जियो रामोसले गोल गरे। उनले खेलको ७३ औं मिनेटमा पेनाल्टीमा पाएको अवसरको सदुपयोग गर्दै गोल गरेका थिए।
पहिलो हाफमा कुनै गोल नभएपछि गोलरहित बराबरीमै रोकिएको थियो। तर दोस्रो हाफमा कप्तान रामोसले गोल गर्दै जिनेदिन जिदानेको क्लबलाई जित दिलाए।
जितसँगै रियल मड्रिडले शीर्षस्थानमा रहेर दोस्रो स्थानको बार्सिलोनासँग ७ अंकको अग्रता बनाएको छ। अंकतालिकामा रियलको ७७ अंक रहँदा बार्सिलोनाको ७० अंक छ। तेस्रो स्थानको एट्लेटिको उपाधि होडबाट पहिले नै बाहिरिसकेको छ।
यता ला लिगाका खेलमा डिफेन्डर रामोसले उत्कृष्ट खेल प्रदर्शन गरेर १० गोल पुर्याएका छन्। उनले जारी लिगमा तीन पेनाल्टी गोलसहित १० गोल पुर्याएका हुन्।
त्यस्तै जारी सिजनमा उनले रियलका लागि १२ गोल गरेका छन्।