पर्सा– पर्सा प्रहरीले हुण्डी कारोबारमा संलग्न ज्वेलरी सञ्चालकसहित ३८ लाख ५१ हजार रुपैयाँ बरामद गरेको छ। वीरगन्ज महानगरपालिका वडा नम्बर ६ माईस्थान वडा नम्बर ६ स्थायी घर भएका कन्हैया प्रसाद सोनारको घरबाट उक्त रकम सहित पक्राउ गरिएको पर्सा प्रहरीले जनाएको छ।
पर्सा प्रहरीले बुधबार दिउँसो केपी ज्वेलर्सभित्र अवैध वित्तीय कारोबार भइरहेको सूचनाको आधारमा खानतलासी गर्दा स्रोत नखुलेको ३८ लाख ५१ हजार रुपैयाँ बरामद गरिएको पर्साका प्रहरी नायब उपरीक्षक ओमप्रकाश खनालले बताए।
केपी ज्वेलर्सका सञ्चालक कन्हैया प्रसाद सोनार र सोही ज्वेलर्समा काम गर्ने परवानीपुर गाउँपालिका वडा नम्बर ३ बस्ने २० वर्षिय दिपक कुमार सर्राफलाई नियन्त्रणमा लिएर बैंक तथा वित्तीय संस्था सम्बन्धी ऐन, २०७३ विरुद्धको कसुरमा थप अनुसन्धान भइरहेको पर्सा प्रहरीले जनाएको छ।