चौरहजारी घटनाको थुनछेक बहस आज पनि सकिएन

गएको जेठ १० गते शनिबार ६ जनाको ज्यान जाने गरी भएको रुकुम पश्चिमको चौरजहारीस्थित सोतीमा भएको घटनाको आज आइतबार पनि थुनछेक बहस सकिएन।

जिल्ला अदालतमा दिनभर चलेको बहस सोमबार पनि निरन्तर हुने अदातले जनाएको छ।

जिल्ला सरकारी वकिल कार्यालयका न्यायाधिवक्ता विनोद पौडेलले आइतबार बहस नसकिएको जानकारी दिए। केही कानुन व्यवसायीले बहस गर्न बाँकी रहेकोले बहस सोमबार पनि निरन्तर हुने पौडेलले बताए।

उनका अनुसार आइतबार १७ जना कानुन व्यवसायीले बहस सकेका छन्। शुक्रबार ७ जना र आइतबार १० जना कानुन व्यवसायीले बहस गरेका छन्। सोमबार थुनछेकको आदेश आउन सक्ने सम्भावना रहेको उनले बतए।

रुकुम पश्चिमको चौरजहारी नगरपालिका–८ सोतीमा मल्ल थरकी प्रेमिका लिन जेठ १० गते १९ युवा लिएर गएका जाजरकोटका नवराज विकसहित ६ जनाको शव भेरी नदीमा भेटिएको थियो।

उक्त घटनामा सरकारी वकिलको कार्यालयले ३४ जनाविरुद्ध कर्तव्य ज्यानलगायत मुद्दामा अभियोग पत्र दर्ता गरेको छ। अभियुक्त मध्ये २९ जना पक्राउ परेका छन् भने पाँच जना फरार छन्।