काठमाडौं- डोटीमा सामुदायिक वनको काठ हिनामिना गरेको अभियोगमा एक प्रहरी निरीक्षक र वनका अध्यक्षविरुद्ध अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको छ।
इलाका प्रहरी कार्यालय बीपीनगरका प्रहरी निरीक्षक नृपबहादुर बोहरा र केदार सामुदायिक वन उपभोक्ता समितिका अध्यक्ष चक्र बहादुर साउदविरुद्ध अख्तियारले आइतबार मुद्दा दायर गरेको हो।
दुई जना मिलेर सामुदायिक वनको काठ हिनामिना गरेको भन्दै अख्तियारले जनही ६१ हजार २० रुपैयाँ बिगो माग दाबी गरी मुद्दा दायर गरेको प्रवक्ता प्रदीपकुमार कोइरालाले जानकारी दिए।
प्रहरी निरीक्षक बोहोराले अवैध काठ तस्करी गरेर ट्याक्टरमा लोड गरिरहेको समयमा स्थानीयहरुले नियन्त्रणमा लिएका थिए।
स्थानीयले काठ नियन्त्रणमा लिएपछि बोहोराले ढाकछोप गर्न उपभोक्ता समितिलाई दबाव दिएको अनुसन्धानबाट खुलेको अख्तियारले जनाएको छ।
यस्तै अध्यक्ष साउदले इलाका प्रहरी कार्यालय बीपीनगरलाई बिना छुटपुर्जी काठ दिने निर्णय गरी आफ्नो समुदाय मातहतको सरकारी सम्पत्तिको हिनामिना गरेको गरेको अभियोग लागेको छ।