काठमाडौं- बर्दियामा १४ दिन क्वारेन्टिनमा बसेर घर फर्किएकै दिन एक जनाको मृत्यु भएको छ। मृत्यु हुनेमा बारबर्दिया नगरपालिका–३ का ४५ वर्षीय पुरुष छन्।
नगरपालिकाका जनस्वास्थ्य निरीक्षक डिल्लीराज शर्माले आरडीटी नतिजा नेगेटिभ आएपछि उनलाई बिहीबार नै घर पठाएइको जानकारी दिए।
“आरडीटी नतिजा नेगेटिभ आएपछि बिहीबार दिउँसो १ बजे घर गएका थिए, राति नै ज्यान गएछ,” शर्माले भने, “राति श्वास लिन गाह्रो भएको, टाउको र पेट दुखेपछि परिवारले जिल्ला अस्पताल लैजाँदै गर्दा बाटैमा मृत्यु भएछ।”
गत जेठ २२ गते काठमाडौंबाट घर गएका ती पुरुष गाउँकै खुरखुरे बालविकास केन्द्रको क्वारेन्टिनमा बसेका थिए।
उनको पीसीआर परीक्षणका लागि स्वाब संकलन गरी नेपालगन्जस्थित भेरी अस्पताल पठाइएको शर्माले जानकारी दिए। पीसीआर नतिजा आएपछि मात्र शव व्यवस्थापन गरिने उनले बताए।