काठमाडौं- भूमि व्यवस्था, सहकारी तथा गरिबी निवारणमन्त्री पद्माकुमारी अर्यालले जमिनको नापनक्सा गर्ने प्रविधिको विकास गरिएको बताएकी छन्।
मन्त्रालयको विनियोजन शीर्षकमाथि राष्ट्रियसभाका सांसदले उठाएका प्रश्नको बुधबार राष्ट्रियसभामा जवाफ दिँदै मन्त्री अर्यालले अब फिता होइन, यन्त्रबाट जमिनको नापनक्सा गरिने बताइन्।
विगतको त्रुटिपूर्ण नापनक्साका कारण जनताले निकै अप्ठ्यारो झेल्नुपरेकाले यो प्रविधि विकास गरिएको उनको भनाइ थियो।
“विगतमा फिताबाट नापनक्सा गर्दा कमजोरी भयो। त्यसैले अब यन्त्रबाट नापनक्सा गर्न हामी अगाडि बढेका छौं,” मन्त्री अर्यालले भनिन्, “देशभर आधुनिक डिजिटल प्रणालीबाट पुनः नापजाँच भइरहेको छ। यो सबै ठाउँमा गर्न जरुरी पनि छ।”
नेपालमा नापनक्सा क्षेत्रको अत्याधुनिक प्रविधि ‘लाइडर प्रविधि’ यसै आर्थिक वर्षदेखि सुदूरपश्चिम प्रदेशबाट सुरु गरिएको भन्दै उनले त्यसबाट पृथ्वीको धरातलीय स्वरुपको नापजाँच भइरहेको बताइन्। सरकारी स्तरबाट पहिलोपटक यस किसिमको सर्भेक्षण गरिएको उनको भनाइ छ।