काठमाडौं- गण्डकी प्रदेशमा थप २१ जनामा कोरोना भाइरस संक्रमण भएको छ। संक्रमण भएकामा २० पुरुष र एक महिला छन्।
आज संक्रमण पुष्टि भएकामा नवलपरासी (बर्दघाट सुस्ता पूर्व) जिल्लाको हुप्सेकोट गाउँपालिकाका १४ जना (पुरुष), मध्यविन्दु नगरपालिकाका दुई जना (पुरुष), सोही जिल्लाको स्थानीय तह नखुलेका एक (पुरुष), कावासोती नगरपालिकाका एक (पुरुष) छन्।
यस्तै अन्य संक्रमितमा पर्वत फलेबास नगरपालिकाका ३ जना (२ पुरुष र १ महिला) छन्। आज संक्रमित सबै भारतबाट फर्किएका हुन्।
योसहित गण्डकीमा कोरोना संक्रमितको संख्या २४७ पुगेको स्वास्थ्य निर्देशनालयका निर्देशक विनोदविन्दु शर्माले जानकारी दिए। सम्बन्धित जिल्लाको क्वारेन्टिनमा रहेका सबैलाई सम्बन्धित जिल्लामा रहेका आइसोलेसन कक्षमा लैजाने तयारी भइरहेको निर्देशनालयले जनाएको छ।