सिद्धबाबामा जिप दुर्घटना, गम्भीर घाइतेलाई हेलिकप्टरबाट काठमाडौं पठाइयो

भैरहवा– पाल्पाको सिद्धबाबामा जिप दुर्घटना हुँदा पाँच जना गम्भीर घाइते भएका छन् भने एक जनाको अवस्था सामान्य छ।

सोमबार अपराह्न पाल्पाबाट बुटवल आउँदै गरेको प्रदेश–३ ००१ च ४५२२ नम्बरको जिप सिद्धबाबाको भीरबाट तिनाउ नदीमा खसेको हो।

ट्राफिक प्रहरी कार्यालय बुटवलका डीएसपी डिल्लीनारायण पाण्डेका अनुसार घाइते ६ जनाको उद्धार गरी प्रादेशिक अस्पताल बुटवल ल्याइएको थियो।

दुर्घटनामा परी नन्दलाल बस्याल, दया पाण्डेय, बिनोद बस्याल,बालकृष्ण बस्याल र शिव पाण्डेय गम्भीर घाइते भएका छन्। कृष्ण बस्यालको अवस्था भने सामान्य छ। उनीहरू सबै व्यवसायी हुन्।

गम्भीर घाइते पाँच जनालाई थप उपचारको लागि सेनाको हेलिकप्टरमार्फत् काठमाडौं पठाइएको छ।