राष्ट्रियसभाका सदस्य रामनारायण बिडारीले बजेट संशोधन नगर्ने हो भने किन छलफल गरेको भनेर प्रश्न गरेका छन् ।
विनियोजन विधेयक २०७७ मा मन्त्रालयगत शीर्षकहरुमाथि छलफलमा बोल्दै सत्तारुढ दल नेकपाका सांसद बिडारीले भने, ‘सरकारले सांसदहरुले दिएको सुझाव अनुसारको बजेटमा एक रुपैयाँ पनि तलमाथि नहुने हो भने यत्रा दिनको तलब भत्ता ग्वाम ग्वाम खाएर छलफलको नाटक किन गरेको ? बजेट सरकारले जे ल्यायो त्यही नै हुने ? एक रुपैयाँ तलमाथि हुदैन ? यस्तो पनि कहिँ हुन्छ ? यो छलफल नाटक किन गरेको ?’
विपक्षी दललाई लक्षित गर्दै उनले भने, ‘विपक्षी दल पनि उस्तै छ। पैसा यहाँ पनि बढाऊ भन्छ, उता पनि पुगेन भन्छ। अनि बजेटचाहिँ १ सय रुपैयाँमात्रै राखियोस् यो मन्त्रालयमा भन्छ। अनि देश कसरी विकास हुन्छ?’
त्यस्तै उनले मन्त्रालयको लागि छुट्याएको रकम खर्च गर्न नसक्ने मन्त्रीहरुले सामूहिक राजीनामा दिनुपर्ने पनि माग गरेका छन् । उनले बजेट खर्च गर्नका लागि मन्त्रीहरुलाई केले रोक्यो भनेर समेत प्रश्न गरे ।
‘विनियोजित खर्च पनि गर्न नसक्ने ? अरुथोक केही गर्नुपरेन, बजेट छुट्याएको छ, संसदले पास गरेको छ। अख्तियारी समयमा नै दिन नसक्ने र काम गर्न नसक्ने भए किन तलब खाएर बसेको ? मन्त्रीले यो कुरा विचार गर्नुपर्दैन ?’ उनले भने।
उनले सांसदहरु पनि बजेटकै पछाडि दौडने गरेको बताउँदै देशका लागि बजेट र नीति निर्माण गर्नुपर्ने सासद आफ्नो क्षेत्रका लागि कहाँ बजेट पाइन्छ भनेर सुँघ्दै हिँड्ने प्रवृतिले देशको विकास नभएको बताए।