काठमाडाैं- प्रमुख प्रतिपक्षी दल नेपाली कांग्रेसको भ्रातृ संस्था नेपाल विद्यार्थी संघले सरकारले कोरोना महामारी नियन्त्रणमा प्रभावकारी भूमिका खेल्न नसकेको आरोप लगाएको छ। नेविसंघले सोमबार काठमाडौंमा प्रदर्शन गर्दै सरकारले कोरोना संकटका बेलामा सरकारले जनतालाई राहत दिन नसकेको आरोप लगाएको हो।
कार्यक्रममा नेविसंघका अध्यक्ष राजीव ढुंगानाले सरकार नागरिकको स्वास्थ्यप्रति गम्भीर हुन नसेकेको आरोप लगाए। उनले भने, “सङ्कटका बेलामा सरकार जनतालाई राहत दिनुभन्दा पनि आर्थिक अनियमिततामा लाग्यो।” संघले सामुदायिक विद्यालयको गुणस्तर सुधार गर्ने जिम्मा निजीलाई दिने व्यवस्था खारेज गर्नसमेत सरकारसँग आग्रह गरेको छ।
नेविसंघका महामन्त्री दीपक भट्टराईले कोरोना महामारीका कारण विदेशमा अलपत्र परेका नेपालीलाई तत्काल उद्धारमा सरकार लाग्नुपर्ने बताए। मजदुरलाई राहत दिने र पीसीआर परीक्षणको दायरा बढाउन सरकार गम्भीर हुनुपर्ने उनको भनाइ थियो।