काठमाडौं- जबरजस्ती करणी मुद्दामा पर्वत जिल्ला अदालतबाट सजायको फैसला सुनाइएका एक जना पाँच वर्षपछि पक्राउ परेका छन्।
जिल्ला अदालतले २०७२ पुस २८ गते चार वर्ष ११ महिना ६ दिन कैद फैसला सुनाइएका कुश्मा नगरपालिका–३ का ५६ वर्षीय भाने भन्ने बलबहादुर बिकलाई प्रहरीले पक्राउ गरेको छ।
उनीविरुद्ध प्रहरीले ०७२ जेठ ३० गते दिउँसो ७६ वर्षीया महिलालाई जबरजस्ती करणी गरेको अभियोगमा मुद्दा दायर गरेको थियो।
२०७२ असार ३ गते पक्राउ परेका बिक असार २७ गते ३० हजार रुपैयाँ धरौटीमा तारेखमा छुटेका थिए।
पछि अदालतले बिकलाई कैद सजाय तोकेको थियो। त्यसयता फरार रहेका बिकलाई प्रहरीले घरमै लुकिछिपी बसेको अवस्थामा पक्राउ गरी जिल्ला अदालतमा पेश गरेको थियो।
अदालतको आदेशले उनलाई कैद भुक्तानीका लागि कारागार पठाइएको प्रहरीले जनाएको छ।