पर्वतको पहिरोमा पुरिएका ८ जनाको मृत्यु (अपडेट)

काठमाडौं- पर्वतको कुश्मा नगरपालिका–३ दुर्लुङस्थित ढकालबारीमा शनिबार राति गएको पहिरोमा परेर मृत्यु हुनेकाे संख्या ८ पुगेकाे छ।

जिल्ला प्रहरी कार्यालय, पर्वतका प्रहरी निरीक्षक मनीष श्रेष्ठका अनुसार पहिरोमा पुरिएर कुश्मा-३ का ६० वर्षीय तुलबहादुर थापा, ५८ वर्षीया निमुकुमारी थापा, ३१ वर्षीया कृपा थापा, १५ वर्षीय विवेक थापा, १२ वर्षीय सुनिल थापा र ८ वर्षीया बेबिशा थापाकाे मृत्यु भएकाे छ।

त्यस्तै २८ वर्षीया कमला विक र १२ वर्षीय जेनिस विकको पनि मृत्यु भएकाे उनले बताए। पहिराेमा पुरिएर जेनिसा विक हराइरहेकी छिन्।

उनको खोजी जारी रहेको श्रेष्ठले जानकारी दिए। पहिरोमा पुरिएकाको नेपाल प्रहरी, नेपाली सेना र सशस्त्र प्रहरीको टोली उद्धार गरिरहेको छ।

पर्वतका प्रमुख जिल्ला अधिकारी शम्भुप्रसाद रेग्मी, प्रहरी नायब उपरीक्षक विश्वराज अधिकारी, कुश्माका नगरप्रमुख रामचन्द्र जोशी लगायतको टोली घटनास्थलमा पुगेको छ ।

शनिबार साँझ परेको मुसलधारे वर्षापछि पहिरो गएको थियो।