विश्व बैंकले कोभिड–१९ का कारण नेपालको आर्थिक वृद्धिदर १.८ प्रतिशतमा सीमित हुने प्रक्षेपण गरेको छ ।
बैंकले मंगलबार रिपोर्ट सार्वजनिक गर्दै नेपालको आर्थिक वृद्धिदर सन् २०२० मा १.८ प्रतिशतमा सीमित हुने र सन् २०२१ मा २.१ प्रतिशत मात्रै वृद्धिदर हुने प्रक्षेपण गरेको हो । तर
नेपाल सरकारले भने चालू आर्थिक वर्षमा आर्थिक वृद्धिदर २.३ र आगामी वर्षको आर्थिक वृद्धिदर ७ प्रतिशत हुने प्रक्षेपण गरेको छ ।
महामारीले रिकभरीको बाटोमा रहेको नेपालको पर्यटन क्षेत्रमा समेत ठूलो असर परेकोले आर्थिक वृद्धिमा गम्भीर असर पर्ने दावी विश्व बैंकले गरेको छ ।
विश्व बैंकका अनुसार नेपाल, भुटान, श्रीलंका, माल्दिभ्स जस्ता देशमा पर्यटनमा प्रत्यक्ष र अप्रत्यक्ष रुपमा अर्थतन्त्रमा योगदान भएको भए पनि महामारीले त्यसमा समेत ठूलो असर गरेको छ ।
नेपालमा एक तिहाइ पर्यटक चीन र भारतबाट मात्रै आउने गरेको र महामारीका कारण सरकारले गरेको अन्तर्राष्ट्रिय सीमा तथा उडानमा लगाएको रोकका कारण यसले आगामी दिनमा ठूलो असर पर्ने र त्यसले पर्यटनसँग प्रत्यक्ष र अप्रत्यक्ष रुपमा सञ्चालित बजार, आपूर्ति, आन्तरिक उत्पादन तथा निर्माणमा समेत असर पर्ने पनि विश्व बैंकको रिपोर्टले जनाएको छ ।
त्यसैगरी दक्षिण एसियामा सबैभन्दा बढी भारतको अर्थतन्त्रको वृद्धिदर सन् २०२० मा ४.२ मा सीमित हुने र सन् २०२१ मा वृद्धिदर ३.२ प्रतिशत नकारात्मक हुने प्रक्षेपण गरिएको छ । त्यसैगरी पाकिस्तानमा सन् २०२० मा २.६ प्रतिशत वृद्धिदर नकारात्मक हुने र सन् २०२१ मा ०.२ प्रतिशत अर्थतन्त्र नकारात्मक हुने उल्लेख गरिएको छ ।
विश्व बैंकले विश्वको अर्थतन्त्र दोस्रो विश्वयुद्धपछिको सबैभन्दा खराब अवस्थामा पुगेर सन् २०२०मा विश्व अर्थतन्त्र ५.२ प्रतिशतले नकारात्मक हुने प्रक्षेपाण गरेको छ ।