विहीबार, साउन २९, २०७७

कला - साहित्य

सरला गौतमको ‘डुमेरो’ सार्वजनिक

159611027001_Author_Sarala_Gautam.jpg

काठमाडौं– सरला गौतमको उपन्यास ‘डुमेरो’ सार्वजनिक भएको छ। उपन्यासले सानो सहरमा हुर्किएकी किशोरीले ठूलो संसारमा प्रवेश गर्दैगर्दा पहिचान खोज्दाको कथानकलाई अंगालेको छ।

गौतमले पत्रकरिताबाट आफ्नो लेखकीय जीवन आरम्भ गेरकी हुन्। वर्षौंदेखि उनले आफूलाई सामाजिक सरोकारमा मुखरित हुने आलोचनात्मक टिप्पणीकारको रुपमा स्थापित गरेकी छन्।

अखबारका स्तम्भमा उनी सामाजिक र राजनीतिक मुद्दामाथि केन्द्रित रहेर अभिव्यक्त हुने गर्छिन् जसलाई पाठकहरूले निकै रुचाउने गर्छन्। यो उपन्यास उनको पहिलो साहित्यिक कृति हो।

शीर्षक ‘डुमेरो’ आफैंमा नौलो शब्द छ। कुनै गन्तव्यविहीन यात्रामा निस्किएको घुमन्ते अन्वेषकको अर्थ राख्ने यो शब्दले एकैसाथ अनेक प्रतीकात्मक अर्थ बोक्छ।

‘यो शब्द सुन्नमा लयालु त छदै छ,’ गौतम भन्छिन्, ‘तर यसका साथै यसको अर्थ पनि गहन छ। महिलाको पहिचानलाई घरेलुपनले सधैं बन्धनमा पारेको हुन्छ। तर अब हामी इतिहासको मध्य मोडमा उभिएका छौं। जहाँ पुरुष र महिला लिंगको आधारमा मात्र परिभाषित हुने बेला छैन।’

किताबले अरुबेलाकै झैँ प्रकाशन जगतलाई सन्तुष्ट पार्नेमा विश्वस्त रहेकी नेपालयकी सैजन मास्के भन्छिन्, ‘समय साँच्चै चुनौतीपूर्ण छ। यो पुस्तकलाई पनि नेपाली पुस्तक बजारले उत्साहजनक प्रोत्साहन प्रदान गर्छ भन्नेमा हामी आशावादी छौं।’

‘डुमेरो’ को मूल्य ४९५ रुपैयाँ निर्धारण गरिएको छ। पुस्तक देशका प्रमुख पुस्तक पसलमा उपलब्ध हुने नेपालयले जनाएको छ।

पुस्तकको शैलीबारे नेपालयकी भूषिता वशिष्ठ भन्छिन्, ‘गौतमले वकालत गर्ने भाषाको अराजनीतिकरणको धारणा उनको पुस्तकमा पनि देखिएको छ।’

प्रतिक्रिया दिनुहोस्