विहीबार, साउन २९, २०७७

बजार

स्मार्टफोन बिक्रीमा हुवावेले सामसङलाई उछिन्यो

1596100318samsung_huawei-1596088389.jpg

चीनको स्मार्टफोन निर्माता कम्पनी हुवावेले यस वर्षको दोस्रो त्रैमासिक अवधिमा स्मार्टफोन बिक्रीमा नयाँ विश्व रेकर्ड कायम गरेको छ।

स्मार्टफोन बिक्रीको तथ्यांक राख्ने क्यानालिसका अनुसार हुवावेले सामसङलाई पछि पार्दै पहिलो पटक नयाँ रेकर्ड बनाएको हो।

क्यानालिसका अनुसार अमेरिकी प्रतिबन्धको सामना गरिरहेको हुवावेले ५ करोड ५८ लाख थान स्मार्टफोन अन्यत्र पठाएको छ। जबकी सामसङले यही अवधिमा ५ करोड ३७ लाख थान स्मार्टफोन निर्यात गरेको छ।

अमेरिकी प्रतिबन्धका कारण हुवावेका मोबाइल सेटहरुको विदेशमा बिक्री घटेको छ, तर स्वदेशमा माग तिब्र छ। हुवावेका सेटमध्ये ७० प्रतिशतभन्दा बढी चीनमै बिक्री भइरहेका छन्।

क्यानालिसका अनुसार हुवावेका स्मार्टफोनको निर्यात दोस्रो त्रैमासिक अवधिमा झण्डै एक तिहाईले घटेको छ। क्यानालिसका विश्लेषक मो जियाले चिनियाँ बजारले मात्र हुवावेलाई विश्वको पहिलो श्रेणीको स्मार्टफोन निर्माता कम्पनीका रुपमा टिकाइराख्न नसक्ने बताएका छन्।

दूरसंचार नेटवर्किङ उपकरण उत्पादनमा बर्चश्व कायम गर्न थालेको हुवावेलाई लिएर संयुक्त राज्य अमेरिका र चीनबीच विवाद पनि बढेको छ। अमेरिकाले हुवावेका कारण विश्वमै साइबर सुरक्षामा चुनौती खडा हुने चेतावनी दिँदै आएको छ।

अमेरिकाले हालैमात्र हुवावेलाई अमेरिकी बजारमा प्रतिबन्ध लगाएको छ भने यस कम्पनीलाई एक्ल्याउन विश्वव्यापी अभियान नै संचालन गरिरहेको छ।

रासस

प्रतिक्रिया दिनुहोस्