१२ देखि १५ वर्षसम्मका बालबालिकालाई पनि कोरोनाविरुद्धको खोप लगाउन सकिने

लन्डन- बेलायतका प्रमुख चिकित्सा अधिकारीहरुले १२ देखि १५ वर्षसम्मका बालबालिकालाई पनि कोरोनाविरुद्धको खोप लगाउन सकिने बताएका छन्। 

विद्यालयहरु खुला भएसँगै बालबालिकालाई पनि कोरोनाविरुद्धको खोप लगाउनुपर्ने माग भइरहेका समयमा चिकित्सा अधिकारीहरले सरकारलाई १२ देखि १५ वर्षसम्मका बालबालिकालाई खोप लगाउन सकिने सुझाव दिएका हुन्। 

उनीहरुले भने, 'अहिलेको शंका उपशंकालाई र महामारीको जोखिम कम गर्नका लागि यो नै उपयुक्त निर्णय हो।'

चिकित्सा अधिकारीहरुले एक स्वस्थ बालकका लागि फाइजरको एक डोज खोप लगाउन सकिने र यो अभियान जतिसक्दो चाँडो सुरु गर्नुपर्ने सरकारलाई सुझाएका छन्। 

यो अभियान सुरु भएपछि करिब ३० लाख बालबालिकाहरु कोरोनाविरुद्धको खोप लगाउनका लागि योग्य छन्। उनीहरुलाई विद्यालयमा नै खोप उपलब्ध गराउन सकिने जनाइएको छ। 

सरकारले पनि यो निर्णय चाँडै कार्यान्वयनमा ल्याउने जनाएको छ।