काठमाडौं- बिहीबार मध्यराति गाउँमा पसेको चितुवालाई स्थानीयले नियन्त्रणमा लिएका छन्।
राति करिव १० बजेतिर गाउँमा पसेको चितुवालाई स्थानीयले नियन्त्रणमा लिएका हुन्।
चितुवलाई स्थानीयले नियन्त्रणमा लिएर तारले बाँधेर राखेका थिए। त्यसपछि उनीहरुले चिडियाखानालाई खबर गरेका थिए।
उक्त चितुवालाई उद्धार गरेर जाउलाखेलस्थित चिडियाखानामा ल्याइएको चिडियाखानाका भेटेरेनरी डाक्टर राधाकृष्ण घर्तीले जानकारी दिए।
अन्दाजी १० वर्ष जतिको भाले चितुवालाई बेहोस पारी उद्धार गरिएको हो। चितुवालाई पर्सा वन्यजन्तु आरक्षमा लगेर छोडिने चिडियाखानाले जनाएको छ।
कीर्तिपुरमा लकडाउनको अवधिमा गाउँ पसेको यो दोस्रो चितुवा हो। यसअघि एक चितुवाले मानिसलाई आक्रमण गरेपछि स्थानीयले मारेका थिए।