जनकपुरधाम- प्रादेशिक अस्पताल जनकपुरको आइसोलेसनमा रहेका एक जना कोरोना भाइरस (कोभिड-१९) संक्रमित फरार भएका छन्। कोरोना संक्रमण पुष्टि भएका सर्लाहीका ४० वर्षीय पुरुष आइसोलेसनबाट शनिबार राति १ बजेतिर फरार भएका हुन्।
सर्लाही, धनकौलका उनी मध्यरातमा प्रहरीलाई छलेर भागेको बताइएको छ। फरार भएका उनको मानसिक सन्तुलन ठीक नरहेको प्रहरीले जनाएको छ।
अस्पतालका कोभिड १९ फोकल पर्सन डा. कुलदीप पण्डितका अनुसार उनको १४ औं दिनको स्वाब संकलन गर्ने तयारी थियो। यसअघि पनि उनी आइसोलेसनबाट भागेका थिए। यसअघि भागेर रातभर गाउँ पुगेका उनलाई फेरि ल्याइएको थियो।
संक्रमण देखिएपछि उनलाई वैशाख ३१ गते आइसोलोनमा भर्ना गरिएको थियो। फरार भएका ती व्यक्तिको खोजी भइरहेको जिल्ला प्रहरी कार्यालय, धनुषाले जनाएको छ।