भारतसहित चार देशमा कोरोना संक्रमण तीव्र : डब्ल्यूएचओ

पछिल्लो २४ घण्टामा विश्वभर कोरोना भाइरस संक्रमणका एक लाख ६ हजार बिरामी थपिएका छन्।

यो संख्या २४ घण्टा अवधिमा थपिएको अहिलेसम्मकै धेरै हो। विश्व स्वास्थ्य संगठन (डब्ल्यूएचओ) का अनुसार यीमध्ये दुई तिहाई संख्या भारत, अमेरिका, रुस र ब्राजिलमा छ।

बुधबार डब्ल्यूएचओले कोरोना भाइरसको संक्रमण विश्वबाटै ओरालो लाग्न थालेको नठान्न आग्रह गरेको थियो। डब्ल्यूएचओका अनुसार  धनी र विकसित देश लकडाउन समाप्तितर्फ जाँदै छन्, कोरोना भाइरसको संक्रमण गरिब देशहरुमा फैलन थालेको छ।

विश्वभरमा कोरोना भाइरस संक्रमितको संख्या ५० लाख नाघेको छ। यो भाइरसका कारण सवा तीन लाखको ज्यान गइसकेको छ। सबैभन्दा बढी प्रभावित अमेरिकामा संक्रमितको संख्या १५ लाख नाघेको छ। त्यसपछि रुस, ब्राजील र बेलायत छन्।

जेनेभामा बोल्दै विश्व स्वास्थ्य संगठनका प्रमुख टेड्रोस ऐडहेनम गेब्रिएसोसले भनेका छन्, ‘हामीले अझै लामो यात्रा गर्नु छ। चिन्ताको विषय यो महामारी अब निम्न र मध्यम आय भएका देशहरुमा फैलंदो छ।’

भारतमा पछिल्लो २४ घण्टामा ५ हजार ६०९ संक्रमित थपिएसँगै कुल संक्रमित संख्या एक लाख १२ हजार ३५९ पुगेको छ। भारतीय स्वास्थ्य मन्त्रालयका अनुसार हालसम्म संक्रमणका कारण ३ हजार ४३५ को मृत्यु भएको छ भने ४५ हजार २९९ संक्रमित निको भइसकेका छन्।

नेपालमा संक्रमितको संख्या ४४४ पुगेको छ। यीमध्ये ४५ जना निको भइसकेका छन् भने दुई जनाको मृत्यु भएको छ। -एएफपी