काठमाडौं- लकडाउनको समयमा पत्रकारको कार्ड भिरेर राजधानीका विभिन्न ठाउँमा चोरी गर्ने दुई जनालाई प्रहरीले पक्राउ गरेको छ।
महानगरीय प्रहरी अपराध महाशाखाको टोलीले लकडाउनको समयमा विभिन्न चोरीका घटनामा संलग्न भएको आरोपमा दुई जनालाई पक्राउ गरेको हो।
पक्राउ पर्नेमा सुनसरीको इटहरीका २१ वर्षीय हिमाल रसाइली र बाराका २८ वर्षीय अलि आलम मियाँ रहेका छन्।
उनीहरुले एपीवान टेलिभिजनको कार्ड भिरेर चैत २४ गते चाबहिल भत्केको पुलस्थित डा. सुबिन मानन्धरको एप्पलको ल्यापटप र आईप्याड चोरेको महाशाखाले जनाएको छ।
महाशाखाका प्रवक्ता एसपी ईश्वर कार्कीले मोटरसाईकलमा हिड्ने उनीहरुले प्रहरीलाई छल्न पत्रकारको कार्ड देखाउने गरेको अनुसन्धानबाट खुलेको जानकारी दिए।
उनीहरुले नै चैत ३ गते सिनामंगलस्थित एक ब्वाइज होस्टलबाट चारवटा ल्यापटपसहित अन्य सामग्रीहरु चोरी गरेको पपिन कार्कीले बताए।