प्रदेश २ र प्रदेश ५ मा चिकित्सकको थप टोली पठाइँदै

काठमाडौं- कोरोना संक्रमण बढदै गएका प्रदेश– २ र प्रदेश– ५ मा सरकारले कम्तीमा दश–दश जना चिकित्सकको टोली पठाउने भएको छ।

मन्त्रालयका प्रवक्ता विकास देवकोटाका अनुसार सबैभन्दा बढी संक्रमित देखिएका प्रदेश २ र ५ मा यथाशिघ्र चिकित्सकको टोली पठाइने भएको हो।
अहिले प्रदेश ५ मा सबैभन्दा धेरै १७६ जना संक्रमित देखिएका छन्। यसमध्ये पनि बाँकेको नरैनापुरमा सबैभन्दा धेरै छन्।

त्यस्तै प्रदेश–२ मा १३६ जनामा संक्रमण पुष्टि भइसकेको छ। सबैभन्दा थोरै कर्णली प्रदेशमा– १ जनामा मात्र संक्रमण पुष्टि भएको छ। प्रदेश– १ मा ५४, बागमतीमा २७, गण्डकीमा ४, र सुदुरपश्चिममा ५ जनामा संक्रमित भेटिएका छन् ।

सरकारले काठमाडौं उपत्यकामा एका साताभित्र १० हजार परीक्षण गर्ने लक्षसहित इपिडिमियोलोजी तथा रोग नियन्त्रण महाशाखाको अगुवाइमा परीक्षण गरिरहेको छ। जसअन्तर्गत २ हजार २३६ मा आरडीटी परीक्षण गरेकोमा ८१ वटा नमुना पोजेटिभ देखिएको छ।

त्यस्तै १ हजार १९ वटा पीसीआर विधिबाट गरिएको परीक्षणमा ६०१ जनामा नेगेटिभ देखिएको छ भने बाँकीको रिर्पोट आउन बाँकी रहेको मन्त्रालयले जनाएको छ ।

नेपालमा हालसम्म पीसीआर विधिबाट ३२ हजार ६०४ नमूना परीक्षण भएका छन् भने आरडीटी विधिबाट ७४ हजार ६४९। त्यस्तै आजसम्म आइसोलेसनमा रहेकाको संख्या ४५७ छ भने २१ हजार ६२३ जना क्वारेनटाइनमा छन्।

नेपालमा आज थप २७ जनामा कोरोना भाइरसको संक्रमण पुष्टि भएसँगै संक्रमितको कुल संख्या ४०२ पुगेको छ।