'महामारीमा पनि सरकार भ्रष्टाचारमा लिप्त'

प्रमुख प्रतिपक्षी दल नेपाली कांग्रेसका महामन्त्री शशांक कोइरालाले महामारीका बेला पनि सरकार भ्रष्टाचारमा लिप्त रहेको बताएका छन्।

यही जेठ २ गते संसदमा प्रस्तुत भएको सरकारको नीति तथा कार्यक्रममाथि टिप्पणी गर्दै कोइरालाले कोरोना नियन्त्रणका लागि लाग्नुपर्ने सरकार भ्रष्टाचारमा लागेको आरोप लगाएका हुन्।

नीति तथा कार्यक्रमले कोरोना भाइरस रोकथामलाई प्राथमिकता नदिएको र सरकारले आफ्नै गुणगान गरेको कोइरालाले बताए।

लिम्पियाधुरा र लिपुलेकको विषय नीति तथा कार्यक्रममा समेटिएकोमा सकारात्मक भन्दै कोइरालाले समस्या समाधानका लागि कूटनीतिक पहल थाल्न अनुरोध गरेका छन्।

विदेशबाट फर्किन चाहने नेपालीहरुलाई ल्याउने व्यवस्था गर्न र वैदेशिक रोजगारीबाट फर्किनका लागि ठोस योजना ल्याउन उनले आग्रह गरे।

दैनिक ज्यालादारीमा काम गर्नेहरुका लागि राहतको प्याकेज घोषणा गर्न पनि उनले माग गरे।

कोरोना महामारीको अवधिमा स्वास्थ्यकर्मी र सुरक्षाकर्मीको मनोबल बढाउनेतर्फ सरकारले ध्यान दिनुपर्ने सुझाव उनले दिए।