काठमाडाैं- नेकपा नेता भीम रावलले अमेरिकी सहयोग एमसीसी (मिलेनियम च्यालेन्ज कर्पोरेसन) सम्झौता पछाडिको ढाेकाबाट ल्याएर अनुमाेदन गर्न खोजिएको भन्दै त्यो नेपाली जनताका लागि मान्य नहुने बताएका छन्।
संसद्को सोमबारको बैठकमा सरकारको नीति तथा कार्यक्रममाथिको छलफलमा उनले एमसीसी सम्झौता महाकाली सन्धिजस्तै रहेको बताए।
नेकपाद्वारा एमसीसीबारे अध्ययन गर्न सत्तारुढ नेकपाद्वारा गठित कार्यदलका सदस्यसमेत रहेका रावलले भने, 'यो महाकाली सन्धिजस्तै देशको हितविपरीत छ। महाकाली सन्धि गर्दा संशोधन गर्दै जाने भनिएको थियो तर संशोधन हुन सकेन। एमसीसी पनि त्यस्तै राष्ट्र हित विपरीत छ।'
उनले एमसीसी सम्झौता देशकाे हितमा छ भनेर नेपाली जनतालाई भ्रम मात्र छर्ने काम भइरहेकाे बताए।
एमसीसीमा रहेको अन्तरदेशीय उद्योग खाेल्ने प्रावधान कुनै कानुनमा नरहेको उनकाे भनाइ छ।