जेठ २० गतेसम्म लकडाउन गर्ने सरकारकाे निर्णय

काठमाडौं - सरकारले मुलुकमा जारी लकडाउन १५ दिन थपेको छ। मन्त्रिपरिषद्को केहीबेर अघि सम्पन्न बैठकले जेठ २० गतेसम्मका लागि लकडाउन थप गर्ने निर्णय गरेको हो।

आइतबारै बसेको कोभिड-१९ नियन्त्रण तथा रोकथाम समिति बैठककाे सिफारिसअनुसार सरकारले लकडाउन १५ दिन थप गरेकाे हाे।  सिन्धुपाल्चोककी २९ वर्षीया महिला र बाँकेका २५ वर्षीय पुरुषको कोरोना संक्रमणका कारण मृत्यु भएको छ। यस्तै मुलुकमा काेराेना भाइरसका २ सय ९५ संक्रमित देखिएका छन्।

कोरोना भाइरस संक्रमणको जोखिम बढेपछि चैत ११ देखि मुलुक लकडाउनमा छ। लकडाउन पहिलोपटक चैत १८ गतेसम्मका लागि घोषणा गरिएको थियो।

दोस्रोपटक एक हप्ता थपेर २५ चैतसम्म लम्ब्याइयो। फेरि वैशाख ३ गतेसम्म लकडाउन थपिएको थियो। त्यसपछि १२ दिन थपेर वैशाख १५ सम्म, १० दिन थपेर वशाख २५ गतेसम्म र १० दिन थपेर जेठ ५ गतेसम्म लकडाउन गरिएको छ।