घन प्रहार गरी साथीको हत्या, गाडेको अवस्थामा शव फेला

पोखरा- कास्कीमा एक युवकको आफ्नै साथीले हत्या गरेर गाडेको अवस्थामा एक महिनापछि शव फेलापरेको छ।

हत्यामा संलग्न चार जनालाई प्रहरी पक्राउ गरेको छ। कास्की प्रहरी प्रमुख एसपी दानबहादुर कार्कीका अनुसार पोखरा महानगरपालिका-१४ समिनतारा सुकुम्बासी बस्तीमा बस्ने २२ वर्षीय बिमल रानाभाटको शव फेला परेको छ।

रानाभाटलाई घनले प्रहार गरी हत्या गरेर आफ्नै घर पछाडि बारीमा गाडेको अवस्थामा प्रहरीले शव फेला पारेको हो।

हत्याको आरोपमा प्रहरीले २१ वर्षीय ज्ञान बहादुर परियार, १८ वर्षीय किशोर र बाग्लुङ घर भएका १९ वर्षीय सागर परियारलाई पक्राउ गरेको जनाएको छ।

उनीहरुकै बयानका अधारमा रानाभाटको शव फेला परेको प्रहरीले जनाएको छ।

‘पूर्व तयारी गरेर नै उनको हत्या गरेको देखिन्छ’ कार्कीले भने, ‘पहिले खाल्डो खनेर पछि हत्या गरेको खुलेको छ।’ ज्ञानबहादुर विवाहित हुन भने बिमल अविवाहित हुन्।

ज्ञानबहादुरले बिमलमाथि आफ्नो पत्नीसँगको अवैध सम्बन्धको आशंकामा हत्या गरेको खुलेको कार्कीले बताए।

घटनाबारे थप अनुसन्धान भइरहेको उनले जानकारी दिए।