सवारी दुर्घटनामा २ जनाको ज्यान गयो

काठमाडौं- रौतहट र तनहुँमा शनिबार भएका छुट्टाछुट्टै दुर्घटनामा परी २ जनाको ज्यान गएको छ।

रौतहटको बौधीमाई नगरपालिका–५ स्थित सडकमा बीआर ०५ पीओ ७२३ नम्बरको मोटरसाइकल अनियन्त्रित भई दुर्घटना हुँदा २३ वर्षीया अनिता यादवको मृत्यु भएको छ।

दुर्घटनामा गम्भीर घाइते भएकी उनको उपचारका लागि वीरगन्जतर्फ लैजाने क्रममा बाटोमै मृत्यु भएको प्रहरीले जनाएको छ।

यस्तै तनहुँको भानु नगरपालिका–१ अँधेरीखोलामा ट्याक्टरबाट लडेर स्थानीय १८ वर्षीय नवीन परियारको मृत्यु भएको छ।

भन्सारबाट पुर्कोटतर्फ जाँदै गरेको ग.१ त ५५०२ नम्बरको ट्याक्टरबाट लडेर गम्भीर घाइते भएका उनको लक्ष्मी अस्पताल डुम्रेमा उपचारको क्रममा मृत्यु भएको प्रहरीले जनाएको छ। ट्याक्टर र चालकलाई प्रहरीले नियन्त्रणमा लिएको छ।