काठमाडौं- नेपालमा थप ९ जनामा कोरोना भाइरस संक्रमण पुष्टि भएको छ। राष्ट्रिय जनस्वास्थ्य प्रयोगशालामा, भेरी अस्पताल नेपालगन्ज र बीपी कोइराला स्वास्थ्य विज्ञान प्रतिष्ठान धरानमा गरिएको परीक्षणमा थप ९ जनामा कोरोना भाइरस संक्रमण पुष्टि भएको स्वास्थ्य मन्त्रालयले जनाएको छ।
योसँगै नेपालमा कोरोना भाइरस संक्रमितको संख्या २६७ पुगेको छ। आज संक्रमित पुष्टि भएकामा वीरगन्जका ४ जना (९ र १० वर्षीय बालक तथा २३ र ४७ वर्षीया महिला), उदयपुर त्रियुगाका २५ वर्षीय पुरुष, दाङका ३ जना (गढवा ४ र ५ तथा तुलसीपुर ७ निवासी २३, ३६ र ३४ वर्षका पुरुष) तथा काठमाडौं सतुंगलका ७ वर्षीय बालक छन्।
उनीहरु सबै स्वास्थ्यकर्मीको सम्पर्कमा रहेको स्वास्थ्य मन्त्रालयका सहप्रवक्ता समिरकुमार अधिकारीले बताएका छन्।