जनार्दन शर्माले भने– सांसद विकास कोषको काम छैन

काठमाडौं– सत्तारुढ दल नेपाल कम्युनिस्ट पार्टी (नेकपा)का सांसद जनार्दन शर्माले स्थानीय पूर्वाधार विकास कार्यक्रम खारेज गर्न माग गरेका छन्।

शुक्रबार एक ट्विट गर्दै सांसद शर्माले राष्ट्रको समग्र विकास समेटिने गरी काम गर्न सांसद विकास कोष खारेज गर्न माग गरेका हुन्।

शर्माले ट्विटरमा भनेका छन्, “राष्ट्रको समग्र विकासको मूल रणनीतिभित्र सबै समेटिने गरी काम गरौं, छुट्टै सांसद क्षेत्र बिकास कोष चाहिँदैन।”

प्रतिपक्षी दलसहित सत्तापक्षका केही सांसदहरूले समय–समयमा सांसद विकास कोष खारेज गर्न माग गर्दै आइरहेका छन्। यो कोषमार्फत हरेक निर्वाचन क्षेत्रमा ६ करोड रूपैयाँ जाने गरेको छ।

उक्त रकम सदुपयोगभन्दा दुरुपयोग धेरै हुने गरेको व्यापक जनगुनासो आउने गरेको छ। सांसदले चुनाव लड्दा गरेको खर्च यही कोषको रकमबाट अशुल्ने गरेको आरोप लाग्ने गरेको छ।