न्युयोर्क- कोरोना भाइरसका कारण बेरोजगार हुनुपरेको भन्दै अमेरिकामा तीन करोड ६० लाखभन्दा बढीले बेरोजगार भत्ताका लागि फाराम भरेका छन्।
उनीहरुमध्ये झण्डै तीस लाखले पछिल्लो एक हप्तामा मात्रै फाराम भरेको अधिकारीहरुले जानकारी दिएका छन्।
बेरोजगार भत्ताको दावी गर्नेहरुको संख्या बढ्दै गएपछि सरकारले केही राज्यहरुमा व्यापारिक तथा व्यावसायिक गतिविधिलाई पुनः सञ्चालन गर्न अनुमति दिएको छ।
कोरोना भाइरसको सङ्क्रमण फैलिन थालेपछि अहिले लाखौं मानिसले अमेरिकामा रोजगारी गुमाएको श्रम विभागले बिहीबार जनाएको छ।
यति धेरै मानिस एकैचोटि रोजगारविहीन भएको र बेरोजगार भत्ता पनि यति धेरै मानिसले एकै पटक मागेको यो दुर्लभ घटना भएको अधिकारीहरुले जनाएका छन्।
बेरोजगार भत्ताका लागि फाराम भरेका मध्ये केही राज्यका कतिपयले भने अहिले पनि त्यो राहत प्राप्त गर्न निकै कठिनाइ भइरहेको बताएका छन्।