भारतबाट कपिलवस्तु सीमा हुँदै २१ युवा नवलपुर आइपुगेका छन्। बौदिकाली, कावासोती, देवचुली र तनहुँको घिसिङ गाउँपालिकाका युवा कपिलवस्तुको चोरबाटो हुँदै नवलपुर आइपुगेका हुन्।
कोरोना भाइरस संक्रमण जोखिमका कारण भारतमा रहेका नेपालीलाई सरकारले घर फिर्तीमा कडाइ गरेपछि उनीहरुले चोरबाटो प्रयोग गरेका हुन्।
सबैभन्दा धेरै बौदिकाली गाउँपालिकाका १६, कावासोती नगरपालिकाका २, देवचुली नगरपालिकाका १ र तनहुँ घिसिङ गाउँपालिकाका २ जना रहेको जिल्ला प्रहरी कार्यालय नवलपुरले जनाएको छ।
भारतका विभिन्न सहरमा रहेका उनीहरु कपिलवस्तु सीमासम्म ट्रकमा आएका थिए। ३६ जना आएकामा २ समूहमा छुट्टिएको उनीहरुलाई उधृत गर्दै प्रहरीले बताएको छ।
सीमाबाट लुकेर आउँदै गरेका बाँकी १५ जना तनहुँका युवा रहेको जिल्ला प्रहरी कार्यालय नवलपुरका प्रमुख दीपक रेग्मीले जानकारी दिए। उनीहरुको खोजीकार्य भइरहेको छ।
देवचुली र कावासोतीका युवालाई स्थानीय तहले जिम्मा लिएर क्वारेन्टिनमा राखिसकेको छ भने बौदिकाली र घिसिङ गाउँपालिकाका युवालाई प्रहरीले बौदिकाली गाउँपालिका पठाएको छ ।
भारतबाट नवलपुर प्रवेश गरेका सबै युवाको स्वाब संकलन गरी परीक्षण गरिने नवलपुरका प्रमुख जिल्ला अधिकारी पीताम्बर घिमिरेले बताए।