सुत्केरी बोकेको एम्बुलेन्स खोलामा खस्यो

बाँके- जिल्लाको कोहलपुरस्थित रोहिणी खोलामा सुत्केरी बोकेको एम्बुलेन्स खसेको छ। दुर्घटनामा ६ जना घाइते भएका छन्।

मेडिकल कलेज कोहलपुरबाट चार दिने सुत्केरी बोकेर गइरहेको भे १ च ३१७१ नम्बरको एम्बुलेन्स कोहलपुर नगरपालिकाको वडा नं. १२ स्थित रोहिणी खोलामा खसेको हो।

एम्बुलेन्स सडकदेखि झण्डै सय मिटर तल खोलामा खसेको बताइएको छ। एम्बुलेन्समा सुत्केरी प्रमिला परियार, उनकी चार दिनकी छोरी, उनका श्रीमान, ससुरा, एम्बुलेन्स चालक र अर्का एक जनासहित ६ जना सवार थिए।

दुर्घटनामा परेका सबै जना घाइते भएका छन्। उनीहरु सबैको मेडिकल कलेज कोहलपुरमा उपचार भइरहेको छ। दुर्घटनाको कारण खुलेको छैन।