काठमाडौं– प्रतिनिधिसभाको आज आइतबारको दोस्रो बैठक पनि नेकपा एमालेले अवरुद्ध गरेको छ। बैठक सुरु भएलगत्तै एमाले सांसदहरु नाराबाजीमा उत्रिएका छन्।
पार्टीले कारबाही गरेका १४ जना सांसद उपस्थित भएको विरोधमा एमालेले प्रतिनिधिसभा बैठक अवरुद्ध गरेको हो।सांसदहरुले पार्टी फुटाउने षड्यन्त्र मुर्दावाद, गैरसांसदलाई प्रवेश निषेध गर, संसदीय मर्यदा कायम गर, संवैधानिक सर्वोच्चता कायम गर, पक्षपातपूर्ण व्यवहार बन्द गर लगायत नारा लगाइरहेका छन्।
एमालेको अवरोधका कारण आजको पहिलो बैठक सभामुखले १५ मिनेटका लागि स्थगित गरेका थिए। बैठक स्थगित गरेर सभामुखले एमाले प्रमुख सचेतक विशाल भट्टराई, सचेतक शान्ता चौधरी र खगराज अधिकारीसँग छलफल गरेका थिए। छलफलमा सत्तारुढ गठबन्धनको तर्फबाट कांग्रेस नेता तथा कानुनमन्त्री ज्ञानेन्द्रबहादुर कार्की पनि सहभागी थिए। तर, बैठकमा सहमति जुट्न सकेन।
एमालेले संसद् अवरुद्ध गरेको आज तेस्रो दिन हो। गत बिहीबार र शुक्रबारको बैठकमा पनि एमाले सांसदहरुले नाराबाजी गर्दै अवरोध गरेका थिए।