जुम्लामा पूल टेष्ट, एकै दिन ८४९ जनाको पीसीआर परीक्षण

जुम्लामा एकै दिन ८ सय ४९ जनामा कोरोना भाइरसको परीक्षण गरिएको छ ।

पीसीआर मेसिनबाट परीक्षण गरिएका सबैको नतिजा नेगेटिभ आएको कर्णाली स्वास्थ्य विज्ञान प्रतिष्ठान (शिक्षण अस्पताल) का निर्देशक डाक्टर मंगल रावलले जानकारी दिए।

पूल टेष्ट (५ जनाको स्वावलाई एकै ठाउँमा मिसाएर) परीक्षण गरिएको थियो । ‘पीसीआर मेसिनले एक पटकमा ९४ जनाको परीक्षण गर्न सक्छ तर हामीले पुल टेष्ट विधि अपनायौंँ,’ डाक्टर रावलले भने, ‘मंगलबार विहान ८ बजे सुरु गरेको परीक्षण बुधबार विहान ३ बजे सकेका हौँ ।’

जुम्लामा भारत र तेस्रो मुलुकबाट गाउँ फर्किएका प्रायः सबै नागरिकको नमूना परीक्षण सकिएको अनुमान गरिएको छ । यसअघि जुम्लाबाट ३ सय ४२ जनाको पीसीआर गरिसकिएको छ । कोरोनाको त्रासपछि भारत र तेस्रो मुलुक गरी ६९७ जना नागरिक गाउँ फर्किएको प्रदेश स्वास्थ्य निर्देशनालयले जनाएको छ ।

गएको सोमबार प्रतिष्ठान र जिल्ला जनस्वास्थ्य कार्यालयका स्वास्थ्यकर्मीहरुले सबै स्थानीय तहबाट ८४९ जनाको स्वाव संकलन गरेको थियो । जुम्लामा ८ वटा मात्रै स्थानीय तह छन् ।