अमेरिकास्थित युनिभर्सिटी अफ वासिङटन इन्स्टिच्युट फर हेल्थ म्याट्रिक्स एन्ड इभाल्युएसन (आईएचएमई) ले आगामी अगस्टको सुरुवातसम्ममा कोरोना भाइरसबाट अमेरिकामा १ लाख ४७ हजारभन्दा बढीको मृत्यु हुन सक्ने बताएको छ।
आईएचएमईको यो अध्ययन प्रतिवेदन मंगलबार सार्वजनिक भएको हो। यो संख्या यही संस्थाले यसअघि अनुमान गरेको भन्दा १० हजार बढी हो।
संक्रमण रोक्नका लागि लागू गरिएको लकडाउन खुकुलो बनाउनु थप खतरनाक हुने चेतावनी पनि उसले दिएको छ। अहिलेसम्म अमेरिकामा कोरोना भाइरस संक्रमणबाट ८२ हजार २४६ जनाको मृत्यु भइसकेको छ।
आईएचएमआईको अनुमानले अमेरिकामा कोरोना संकट अझ गहिरिँदै गएको पुष्टि हुन्छ। मंगलबार नै अमेरिकाका कोभिड–१९ टास्क फोर्स प्रमुख डा. एन्थोनी फाउचीले लकडाउन खोल्नु अमेरिकाका लागि खतरनाक हुने बताएका थिए।
कोरोनाविरुद्धको भ्याक्सिन तयार गर्ने प्रयास भइरहेको भए पनि त्यसको कुनै ग्यारेन्टी नभएको उनको भनाइ छ।
बीबीसी